Kryeministri Edi Rama, ka reaguar pas operacionit të përbashkët ushtarak të Shteteve të Bashkuara dhe Izraelit ndaj Iranit, duke e cilësuar Korpusin e Gardës Revolucionare Islamike si një organizatë terroriste që duhet trajtuar si e tillë.

Në një postim në platformën X, Rama theksoi se nuk mjafton vetëm vendosja e sanksioneve ndaj Republikës Khomeiniste, por është e domosdoshme që Garda Revolucionare “të quhet me emrin e saj të vërtetë” dhe të renditet zyrtarisht ndër organizatat terroriste, ashtu siç kanë bërë tashmë SHBA dhe Kanadaja.

Ai argumentoi se ky hap është i nevojshëm jo vetëm për solidaritet me Izraelin dhe vendet arabe paqedashëse, apo për mbështetjen e SHBA-së në operacionet ushtarake, por mbi të gjitha për të nderuar viktimat e pafajshme të Gardës Revolucionare.

“Korpusi i Gardës Revolucionare Islamike është një organizatë terroriste dhe duhet të trajtohet si e tillë. Jo vetëm përmes sanksioneve ndaj Republikës Khomeiniste, por edhe duke e quajtur zyrtarisht me emrin e saj të vërtetë dhe duke e listuar ndër organizatat terroriste, ashtu siç kanë bërë tashmë Shtetet e Bashkuara dhe Kanadaja. Jo vetëm sepse qëndrojmë fort pranë Izraelit dhe vendeve arabe vëllazërore që kërkojnë paqe. Jo vetëm sepse mbështesim Shtetet e Bashkuara në mbështetjen ushtarake ndaj Izraelit sot, nën udhëheqjen e Presidentit Donald Trump. Jo vetëm sepse Bashkimi Evropian, përmes Presidentes Ursula von der Leyen, ka theksuar sërish sot natyrën vrastare të regjimit të Teheranit. Por mbi të gjitha, në një ditë si kjo, kur kërkohen veprime dhe jo vetëm fjalë, për të nderuar viktimat e pafundme të pafajshme të Gardës Revolucionare Islamike”, shkruan ai.

Rama kujtoi se Shqipëria është përballur drejtpërdrejt me agresionin e Teheranit përmes sulmeve kibernetike, duke e cilësuar këtë si çështje sigurie kombëtare dhe qartësi morale e ligjore.

“Shqipëria do të veprojë në përputhje me këtë. Ne do ta listojmë Gardën Revolucionare ndër organizatat terroriste dhe u bëjmë thirrje miqve tanë evropianë të bëjnë të njëjtën gjë,” u shpreh ai.

Kryeministri nënvizoi se mbështet çdo përpjekje vendimtare për të parandaluar që regjimi i Teheranit të pajiset me kapacitete bërthamore apo ushtarake të tjera që mund të kërcënojnë Izraelin dhe vendet e tjera të rajonit.

“Terrorizmi duhet të quhet me emrin e tij. Dhe pasi të quhet, duhet të ndalet,” përfundoi Rama.

Postimi i plotë

Është koha të pritet litarin dhe të shkohet drejt e në pikë.

Korpusi i Gardës Revolucionare Islamike është një organizatë terroriste dhe duhet të trajtohet si e tillë. Jo vetëm përmes sanksioneve ndaj Republikës Khomeiniste, por edhe duke e quajtur zyrtarisht me emrin e saj të vërtetë dhe duke e listuar ndër organizatat terroriste, ashtu siç kanë bërë tashmë Shtetet e Bashkuara dhe Kanadaja.

Jo vetëm sepse qëndrojmë fort pranë Izraelit dhe vendeve arabe vëllazërore që kërkojnë paqe.

Jo vetëm sepse mbështesim Shtetet e Bashkuara në mbështetjen ushtarake ndaj Izraelit sot, nën udhëheqjen e Presidentit Donald Trump.

Jo vetëm sepse Bashkimi Evropian, përmes Presidentes Ursula von der Leyen, ka theksuar sërish sot natyrën vrastare të regjimit të Teheranit.

Por mbi të gjitha, në një ditë si kjo, kur kërkohen veprime dhe jo vetëm fjalë, për të nderuar viktimat e pafundme të pafajshme të Gardës Revolucionare Islamike.

Shqipëria është përballur drejtpërdrejt me fytyrën barbare të regjimit të Teheranit përmes agresioneve kibernetike ndaj vendit tonë. Për ne, kjo nuk është gjeopolitikë abstrakte. Është siguri kombëtare, qartësi morale dhe ligjore.

Shqipëria do të veprojë në përputhje me këtë. Ne do ta quajmë Gardën Revolucionare ashtu siç është dhe do ta listojmë ndër organizatat terroriste, duke u bërë thirrje miqve tanë evropianë të bëjnë të njëjtën gjë.

Ne mbështesim plotësisht çdo përpjekje vendimtare për të parandaluar njëherë e përgjithmonë që vrasësit në Teheran të pajisen me kapacitete bërthamore apo ushtarake të tjera për të dëmtuar Izraelin ose ndonjë komb tjetër paqedashës në Lindjen e Mesme.

Terrorizmi duhet të quhet me emrin e tij. Dhe pasi të quhet, duhet të ndalet.